2015年2月6日 星期五

觀影小記︰《木昇戰紀》(Jupiter Ascending)

《木昇戰紀》(Jupiter Ascending,dir: The Wachowskis,2015)
Horace's Rating︰5/10(Average)

       (好少全用廣東話寫文章,原來好鬼難)哈哈哈,幾得意丫,成套卡通片咁,角色可以踩噴射鞋飛來飛去,好似哪吒啊,徐克同周星馳合作拍《西遊降魔篇 2》,可以問導演兩姐弟借問套特技呢。話時話,導演兩姐弟話原本寫左六百頁劇本,宜家得兩個鐘咁少,梗係拍到零零碎碎左漏右缺講唔通,唔緊要啦,其實這類故事,大家都耳熟能詳,隨便搵套日本動畫,好似《天空之艾斯卡科尼》(Escaflowne,2000)咁,故事都清楚、精彩好多,睇得過癮就好嘛。所以呢,咪睇下設計、畫面,哈哈,當打場機囉,不過講到套戲既太空城市同宇宙飛船「參考」過歐洲藝術同古城乜乜乜咁,我以為睇緊《魔法騎士》動畫版第二章(Magic Knight Rayearth,1995)既荷里活版、宇宙版乍,後者仲有創意得多,真係好好笑者。一定有人會話依套戲反映荷里活或潛藏或明示既「科學教」思想,唔好諗咁遠啦,只係又一套人類(準確咁講係美英白人)至上既偽科幻片者,套戲咁多古怪外星人,原來都係「人類」既部下或者基因改造產物,人類仲唔係宇宙最叻(雖然分左等級,有人係王族有人係工業原材料),坊間附會有《星球大戰》(Star Wars)和《廿二世紀殺人網絡》(The Matrix)兩大系列既影子,鱔稿黎者。咁依套戲到底有幾難睇呢?以近年同類作品黎講,應該只有果套搞到迪士尼股價大跌既《異星爭霸戰︰尊卡特傳奇》(John Carter,2012)有得揮(話時話有人識炒依挺股嘛?下次睇到套爛片,即刻去「投資」下幫補睇戲錢都好啊),拿,雖然係咁,套《異星爭霸戰》都得意丫,幾多怪獸幾多飛船飛來飛去啊,唔係咩?哈哈哈。不過講真,依套戲真係搵錯人做,大佬,我從來唔覺得美娜古妮絲(Mila Kunis)有幾索,佢做女一號,演技又擔唔起戲,今次搵佢做星際女王,死梗架喎;卓寧泰坦(Channing Tatum)呢,仲衰,如果淨係睇依套戲,簡直以為佢係二打六。係得艾迪烈柏尼(Eddie Redmayne)睇得下,但都係一下乍,個奸角寫得差嘛,仲話幾萬歲人,都唔用腦既,我係果堆鱷魚頭外星人就唔忍啦,一啖咬死佢自己上位啦。總之奉勸大家唔好去睇,如果睇左就唔好鬧啦,預左丫嘛。最後劇透︰原來依套戲先係真正既「飛鳥俠」啊,哈哈哈。

4 則留言:

  1. 由頭到尾都睇得唔投入,皆因男女主角真係好唔掂!美娜古妮絲冇演技兼開始老老哋唔在講,最唔明點解俄羅斯老母會生個墨西哥女,呢樣真係好很科幻 (呢個角色搵 emma stone 就 fit 嘞)!卓寧泰坦硬係令我諗起曼聯個朗尼,周身肉但腦袋就少條筋,真係唔得佢死!

    回覆刪除
    回覆
    1. 哈哈,轉生嘛,幾萬年一次,豈是我等凡人理解得了

      刪除
  2. 時間金錢有限,咁我放棄呢套啦! 下套想睇的是《狂野行》同Imitation Game.

    回覆刪除
    回覆
    1. 《狂野行》我放棄了,《解密》一定會看的

      刪除